جۇنۇپ ھالەتتە ئۇخلاشنىڭ ھۆكمى توغرىسىدا

سوئال 30784

جىنسى مۇناسىۋەتتىن كېيىن يۇيۇنماستىن شۇ ھالەتتە ئۇخلاپ، بامدات ۋاقتىدا ئويغىنىپ يۇيۇنسام توغرا بولامدۇ؟.  بۇ ھەقتە چۈشەنچە بېرىشىڭلارنى سورايمەن.

قىسقىچە جاۋاپ

شۇنداق، جىنسى مۇناسىۋەتتىن كېيىن يۇيۇنۇشتىن ئىلگىرى ئۇخلاپ، بامدات ۋاقتىدىن ئىلگىرى يۇيۇنۇش ئۈچۈن ئويغانسا بولىدۇ، لېكىن ئۇخلاشتىن بۇرۇن تاھارەت ئېلىۋەتسە ، ئەگەر مۇمكىن بولسا يۇيۇنىۋەتسە ياخشى بولىدۇ.

جاۋاپنىڭ تېكىستى

---

بارلىق گۈزەل مەدھىيىلەر ئاللاھقا خاستۇر، مۇھەممەد ئەلەيھىسسالامغا ئاللاھنىڭ رەھمەت سالاملىرى بولسۇن.

شۇنداق، جىنسى مۇناسىۋەتتىن كېيىن يۇيۇنۇشتىن ئىلگىرى ئۇخلاپ، بامدات ۋاقتىدىن ئىلگىرى يۇيۇنۇش ئۈچۈن ئويغانسا بولىدۇ. بۇنىڭ دەلىلى: ئائىشە رەزىيەللاھۇ ئەنھا مۇنداق دەيدۇ: «پەيغەمبەر ئەلەيھىسسالام جىنسى مۇناسىۋەتتىن كېيىن يۇيۇنماستىن ۋە تاھارەتمۇ ئالماستىن ئۇخلايتتى». [تىرمىزى رىۋايىتى 110-ھەدىس. شەيخ ئەلبانى سەھىھ دەپ، تىرمىزىنىڭ سەھىھ ھەدىسلەر توپلىمىدا 103 -نومۇرلۇق ھەدىستە كەلتۈرگەن].

لېكىن ئۇخلاشتىن بۇرۇن تاھارەت ئىلىپ يېتىش ياخشىدۇر، ئەگەر مۇمكىن بولسا يۇيۇنىۋەتسە تېخىمۇ ياخشى بولىدۇ.

ئائىشە رەزىيەللاھۇ ئەنھادىن:  پەيغەمبەر ئەلەيھىسسالام جىنسى مۇناسىۋەتتىن كېيىن  نېمە ئىش قىلاتتى؟، ئۇخلاشتىن بۇرۇن يۇيۇنۇپ ئۇخلامتى ياكى ئۇخلاپ بولۇپ يۇيۇنامتى؟ دەپ سورالغاندا، ئائىشە رەزىيەللاھۇ ئەنھا:  «پەيغەمبەر ئەلەيھىسسالام شۇ ئىشلارنىڭ ھەممىسىنى قىلاتتى، بەزى ۋاقىتتا ئۇخلاشتىن ئىلگىرى يۇيۇناتتى، بەزى ۋاقىتتا تاھارەت ئىلىپ ئۇخلايتتى دەپ جاۋاپ بەرگەن». [مۇسلىم رىۋايىتى 465-ھەدىس].

ئۆمەر رەزىيەللاھۇ ئەنھۇ پەيغەمبەر ئەلەيھىسسالامدىن:  بىزدىن بەزىلەر جىنسى مۇناسىۋەتتىن كېيىنلا يۇيۇنماي ئۇخلىسا بولامدۇ؟ دەپ سورىغاندا، پەيغەمبەر ئەلەيھىسسالام: «ھەئە، بولىدۇ، ئەگەر تاھارەت ئىلىپ ئۇخلىسا ياخشى» دېگەن.  [بۇخارى رىۋايىتى 280 -ھەدىس. مۇسلىم رىۋايىتى 462 -ھەدىس].

بۇ ھەقتە تېخىمۇ تەپسىلى مەلۇماتقا ئىگە بولۇش ئۈچۈن  97437-  43307-  181351- 14225 ۋە 10319 - نومۇرلۇق سوئاللارنىڭ جاۋابىغا مۇراجىئەت قىلىشنى تەۋسىيە قىلىمىز.

ھەممىدىن توغرىنى ئاللاھ تائالا ياخشى بىلگۈچىدۇر.

ئۇخلاشتىكى ئەدەپ-قائىدىلەر