الحمد للہ.
اول:
اشتہارات کی ویب سائٹ سے کمائی کرنا جائز ہے، اگر اس میں درج ذیل شرائط پائی جائیں:
پہلی شرط: ان ویب سائٹ کی رکنیت کا حصول بلا معاوضہ ہو، چنانچہ اگر ان کی رکنیت کا معاوضہ ہو تو یہ حرام ہو گا؛ کیونکہ یہ جوے اور سود کی شکل ہے؛ اس لیے بھی کہ اس میں پیسے کے بدلے پیسے کا لین دین ہے اور نقد بھی نہیں ہے نیز مقدار بھی یکساں نہیں ہے۔
دوسری شرط: اشتہارات بذات خود جائز ہوں۔
تیسری شرط: رکنیت کا حامل شخص غلط طریقے سے کلک حاصل نہ کرے کہ سافٹ وئیر استعمال کرے یا ویب سائٹ کرائے پر دے کر وزٹر کی تعداد زیادہ شو کرے۔
چوتھی شرط: ہر کلک پر حاصل ہونے والا معاوضہ معلوم ہو۔
جبکہ آپ کے سوال سے واضح ہو رہا ہے کہ اس ویب سائٹ کی رکنیت بلا معاوضہ نہیں ہے، بلکہ آپ 1 ڈالر ادا کریں گے، اس لیے اس سائٹ کی رکنیت حاصل کرنا حرام ہے۔
آپ نے بتلایا کہ ایک ڈالر کے عوض آپ کو اپنی ویب سائٹ کی تشہیر کرنے کا موقع بھی ملتا ہے تو یہ بھی حصولِ رکنیت کے عمل کو جائز قرار دینے کے لیے ناکافی ہے؛ کیونکہ اس ویب سائٹ کے ساتھ معاہدے کی نوعیت یہ ہے کہ آپ ادائیگی کر کے اپنی ویب سائٹ کی تشہیر کر سکیں گے، اور آپ کو اعلانات پر کلک کرنے کا اختیار ملے گا اور اس طرح آپ منافع کمائیں گے، اسی طرح دوسروں کو بھی شرکت کی دعوت دیں گے اور ان کے شریک ہونے سے آپ کو بھی نفع ملے گا۔ تو یہ معاہدہ حرام ہے؛ کیونکہ اس میں سود اور جوا پایا جاتا ہے۔
جوا اس طرح کہ: آپ ادائیگی اس امید سے کرتے ہیں کہ آپ کے ہر کلک کرنے سے آپ کو ادائیگی سے زیادہ کمائی ملے گی، تو یہ ممکن بھی ہے اور ناممکن بھی، یعنی اس میں ادائیگی یقینی ہے لیکن نفع غیر یقینی، یہی جوے کی شکل ہوتی ہے۔
جبکہ سود اس طرح کہ: یہ مال کے بدلے مال ہے، پھر اس میں مقدار بھی یکساں نہیں ہے اور فوری وصولی بھی نہیں ہے۔
اگر آپ چاہتے ہیں کہ آپ اپنی ویب سائٹ کی تشہیر کریں، تو پھر آپ ادائیگی کر کے اپنی ویب سائٹ کی تشہیر کریں، لیکن اشتہارات پر کلک کر کے کمائی مت کریں، یعنی آپ تشہیر اور کمائی دونوں کو جمع مت کریں؛ کیونکہ اس میں حرام کام کے لیے حیلہ بالکل واضح ہے۔
اس بارے میں مزید کے لیے آپ سوال نمبر: (198784 ) کا جواب ملاحظہ کریں۔
دوم:
آپ اپنا اکاؤنٹ کسی کو فروخت کریں کا مطلب یہ ہو کہ آپ اپنی ویب سائٹ کسی کو فروخت کرنا چاہتے ہیں تو اس میں کوئی حرج نہیں ہے۔
اور اگر آپ کا مطلب یہ ہے کہ اشتہارات والی ویب سائٹ پر رکنیت حاصل کرنے والے کو اکاؤنٹ دیا جاتا ہے ، اور اسی میں اس کے پوائنٹس اور منافع ہوتا ہے تو اس کو فروخت کرنا جائز نہیں ہے؛ کیونکہ پہلے گزر چکا ہے کہ یہ معاہدہ ہی جائز نہیں ہے۔
اسی طرح اس ویب سائٹ کی دوسروں کو دعوت دینا بھی جائز نہیں ہے؛ کیونکہ اس میں گناہ اور شریعت کے خلاف کام میں تعاون پایا جاتا ہے۔
واللہ اعلم