اگر مسافر نے جرابوں پر مسح کیا اور پھر اپنے وطن واپس آگیا تو اب وہ صرف ایک دن اور ایک رات (یعنی 24 گھنٹے) تک ہی مسح کر سکتا ہے، اس سے زیادہ نہیں۔ اگر اس نے سفر میں ایک دن اور ایک رات سے کم مسح کیا ہے تو اسے باقی وقت تک مسح کرنے کی اجازت ہے تاکہ دن اور رات مکمل ہو جائیں۔ لیکن اگر اس نے سفر میں ایک دن اور ایک رات سے زیادہ مسح کر لیا ہو تو پھر مقیم ہونے کے بعد مزید مسح کی اجازت نہیں۔ البتہ اگر معاملہ اس کے برعکس ہو، یعنی اس نے پہلے مقیم ہونے کی حالت میں مسح کیا اور پھر سفر اختیار کیا تو اب وہ مسافر کے حساب سے مسح مکمل کرے گا، یعنی تین دن اور تین رات تک، اور اس میں وہ وقت بھی شامل ہو گا جو اس نے مقیم کی حالت میں مسح کیا تھا۔

اگر معاملہ ویسا ہی ہے جیسا آپ نے بیان کیا ہے کہ آپ نے لاعلمی کی بنا پر جرابوں پر مسح کیا، حالانکہ آپ نے انہیں وضو کے بغیر پہنا تھا، تو اہلِ علم کے ایک گروہ کے موقف کے مطابق آپ پر قضا لازم نہیں۔ البتہ اگر آپ کے لیے قضا ممکن ہو تو قضا کرنا بہتر اور زیادہ احتیاط والا عمل ہے۔

آپ پر لازم ہے کہ موزوں پر مسح کی مقررہ مدت کی پابندی کریں۔ جب یہ مدت پوری ہو جائے تو پھر موزے پر مسح کرنا جائز نہیں رہتا، بلکہ انہیں اتار کر نئے وضو کے ساتھ پہننا ہو گا۔ البتہ مدت ختم ہونے سے پہلے اگر آپ وضو کی حالت میں ہیں تو اس وضو کے ساتھ نماز پڑھ سکتے ہیں یہاں تک کہ آپ کا وضو ٹوٹ جائے۔ رہی بات پاؤں دھونے میں مشقت کی تو آپ اس پر قابو پا سکتے ہیں، مثلاً کرسی پر بیٹھ کر پاؤں دھو لیں یا جھکے بغیر ان پر پانی ڈال لیں۔

جرابوں پر مسح کرنے کے لیے انہیں پہنتے ہوئے مسح کرنے کی نیت سے پہننا ضروری نہیں ہے، چنانچہ اگر کسی نے وضو کی حالت میں جرابیں پہنیں تو وہ مقیم ہونے کی صورت میں ایک دن اور رات، جبکہ مسافر ہونے کی صورت میں تین دن اور رات تک مسح کر سکتا ہے۔